21 қазан Ақсу қаласы Мәдениет және тілдерді дамыту бөлімінің ұйымдастыруымен
Ұлы Жеңістің 80 жылдығы мен Республика күніне орай
Қазақстан Жазушылар одағының мүшесі, «Құрмет» орденінің иегері жазушы-журналист, сатирик Ғалымбек Жұматовтың «Ленинград: от пен мұз» кітабының таныстырылымы өткізілді.
Роман — Екінші дүниежүзілік соғыстың ең қайғылы әрі қаһармандық кезеңдерінің бірі – Ленинград блокадасы, сол майданда шайқасқан қазақстандық жауынгерлердің ерлігі, сондай-ақ, соғысқа дейінгі геосаяси текетірес, алып державалар арасындағы астыртын саясат, дүниежүзілік үстемдікке талас сияқты тарихи тақырыптарды кең көлемде қамтитын көркем туынды.
Кітапта тарихи фактілермен қатар, нақты кейіпкерлердің тағдыры арқылы оқырман ХХ ғасырдың ең сұрапыл кезеңіне терең үңіледі. Автор тек әскери оқиғаларды емес, соғыстың себебі мен салдарын, мемлекеттер арасындағы мүдделер қақтығысын да көркем тілмен жеткізген.Тағдырдың тәлкегімен үш революцияның отаны болған шаһар үшін шайқасқа әкелі-балалы Сағымбай мен Нығмет Жұматовтар қатысқан. Қатысып қана қоймай, Ленинград блокадасын бұзып өтуге жол ашқан 1943 жылғы «Искра» және 1944 жылғы Ленинград-Новгород секілді аса маңызды операцияларға белсене қатысқан. Нығмет Жұматов болса, жаудың Пантера – Вотан шебін бұзу кезінде қаза тапты.
Отыз алты бөлімнен тұратын тарихи шығармада осы аталған кейіпкерлердің майдандағы ерліктері, замандастарымен қарым-қатынастары, командирлерінің іс-әрекеттері арқылы Солтүстік майдан тарихы ашылады.
Іс-шара барысында жазушы кітап жазу барысындағы өзінің басынан өткен қызығы мен шыжығы қатар жүрген оқиғаларымен бөлісті. Сонымен қатар жазушы белсенділік танытып қызықты сұрақ қойған оқушыға өзінің қолтаңбасымен кітабын сыйға тартатынын айтты. Мектебіміздің 9 “Ә” сынып оқушысы Құрманғазы Мадина жазушыға сұрақ қою арқылы жазушы-журналист,сатирик Ғалымбек Жұматовтың қолтаңбасы қойылған кітаптың иегері болды.
Ақсу қаласы