23.02–19.03 аралығында өтіп жатқан «Қамқорлық» айлығы аясында ұйымдастырылған «Жақсылық жасап жарысайықшы» акциясы барысында Абай атындағы жалпы орта білім беру мектебінің ұжымы қайырымдылыққа толы игі іс атқарды.
8 Наурыз – Халықаралық әйелдер күні қарсаңында мектеп ұжымы Ақсу қаласындағы қарттар үйіне арнайы барып, ондағы апа-әжелерді көктемнің шуақты мерекесімен шын жүректен құттықтады. Қонақтар мерекелік жылы лебіздерін білдіріп, тәтті себеттер мен сыйлықтар тарту етті. Бұл шағын ғана сыйлықтар апа-әжелерге ерекше көңіл-күй сыйлап, мерекелік атмосфера қалыптастырды.
Іс-шараның басты мақсаты – қарттарға құрмет көрсетіп, оларға қамқорлық таныту, сондай-ақ өскелең ұрпақтың бойына мейірімділік, жанашырлық, үлкенді сыйлау сияқты адамгершілік қасиеттерді қалыптастыру. Осындай қайырымдылық шаралары арқылы қоғамда ізгілік пен қамқорлық құндылықтары насихатталады.
Мектеп ұжымы дайындаған сыйлықтар мен жылы сөздер апа-әжелердің жүздеріне қуаныш ұялатып, жүректеріне жылулық сыйлады. Қарттар да өз алғыстарын білдіріп, ақ баталарын берді. Осындай игі істер адамдар арасындағы сыйластық пен мейірімділікті арттыра түсетіні сөзсіз.